Cambodia International Models (CIM) ដែល​ជា​ក្រុមហ៊ុន​បង្ហាញ​ម៉ូត​ប្រជុំ​នូវ​តារា​ពោរពេញ​ដោយ​ទេពកោសល្យ កាល​ពី​ចុង​សប្ដាហ៍​បាន​រៀបចំ​ពិធី​សម្ពោធ​សាកល្បង​ក្រុមហ៊ុនCIM យ៉ាង​ឱឡារិក ក្រោម​ការ​ចូលរួម​យ៉ាង​ច្រើន​កុះករ​ពី​ភ្ញៀវ​កិត្តិយស​ជាតិ និង​អន្តរជាតិ ហើយ​កាន់តែ​ពិសេស​កម្មវិធី​បាន​គាស់​អស់ បវរកញ្ញា និង​បុរស​ឯក​ក្នុង​វិស័យ Beauty Pageant ឱ្យ​មក​ចូលរួម សរុប​ប្រមាណ​ជិត ១០០ នាក់។ វត្តមាន​បវរកញ្ញា និង​បុរស​ឯក​គ្រប់​ជំនាន់​បាន​បង្ក​ការ​ភ្ញាក់ផ្អើល​ជា​ខ្លាំង​ដ៏​មហាជន ព្រោះ​នេះ​ជា​លើក​ទី​១​ក្នុង​ប្រវត្តិសាស្ត្រ ដែល​បវរកញ្ញា និង​បុរស​ឯក​ក្បែរ​រយ​នាក់​មក​ជួប​ប្រជុំ​គ្នា​បែប​នេះ។

កាន់តែ​អស្ចារ្យ​ជាង​នេះ​ទៀត​នោះ បវរកញ្ញា និង​បុរស​ឯក តុបតែង​ខ្លួន​យ៉ាង​ស្រស់​សោភា ជាមួយ​ឈុត​សម្លៀកបំពាក់ និង​រ៉ូប​ប្រណិត​ៗ អម​ដោយ​គ្រឿង​អលង្ការ​ភ្លឺ​ចែងចាំង បណ្ដើរ​គ្នា​យ៉ាង​ត្រសង​ដើរ​លើ​កម្រាល​ព្រំ​ក្រហម ញ៉ាំង​ឱ្យ​ពិធី​នោះ​កាន់តែ​អធិកអធម​ថែម​មួយ​កម្រិត​ទៀត។ ក្នុង​នោះ ក៏​មាន​ការ​ដើរ​បង្ហាញ​ម៉ូត​ពេជ្រ​ពី​ហាង​ពេជ្រ CSNJ ពី​សំណាក់ Miss Universe Cambodia ៤​ជំនាន់ កញ្ញា រឿន ណាត,សំណាង អេលីណា, រ៉េត សារីតា,ងិន ម៉ារ៉ាឌី, ជា ចារ៉ានី, ឆន ស្រីណេត, បុណ្យ កញ្ចនធីតា និងកញ្ញា ដាំ សុភ័ក្រស៊ីនឌី ថែម​ទៀត​ផង។

លោក ម៉ែន និមលរតន៍ នាយក​ប្រតិបត្តិ CIM ឱ្យ​ដឹង​ថា CIM បង្កើត​បាន​ជាង ១ ឆ្នាំ​ហើយ គិត​ត្រឹម​ថ្ងៃ​សម្ពោធ​​សាកល្បង​នេះ ជាក់ស្ដែង​លោក​ចង់​ធ្វើ​ពិធី​នេះ​តាំង​ពី​ខែ​មេសា ឆ្នាំ​មុន​មក​ម្ល៉េះ តែ​ដោយសារ​ស្ថានភាព​កូវីដ​១៩ នៅ​កម្ពុជា មិន​អំណោយ​ផល​ឱ្យ​រៀបចំ ទើប​ត្រូវ​ពន្យារពេល​រហូត​ដល់​ពេល​នេះ។ ជាង ១ ឆ្នាំ​មក​នេះ CIM បាន​ចូលរួម​ជំរុញ និង​លើក​ស្ទួយ​វិស័យ​បង្ហាញ​ម៉ូត និង​វិស័យ Beauty Pageant យ៉ាង​ពេញ​ទំហឹង តាមរយៈ​ការ​បង្ហាត់​បង្រៀន និង​បញ្ជូន​បេក្ខភាព​កម្ពុជា​ឱ្យ​ចូលរួម​កម្មវិធី​ប្រកួតប្រជែង​សម្រស់​លំដាប់​អន្តរជាតិ​ជាច្រើន ក្នុង​នោះ​មាន​ទាំង​​កម្មវិធី Miss Universe ផង​ដែរ។

ដោយ​ឡែក សម្រាប់​ឆ្នាំ ២០២២ នេះ CIM ទទួល​បាន​សិទ្ធ​ពី​កម្មវិធី​អន្តរជាតិ​ថ្មី​ៗ​ជាច្រើន រហូត​ដល់​ជាង ៤០ កម្មវិធី ដែល​កម្មវិធី​រាប់​បញ្ចូល​ទាំង​ចាស់​ថ្មី ត្រៀម​សម្រាប់​បញ្ជូន​បេក្ខភាព​កម្ពុជា​ទៅ​ចូលរួម​ប្រកួត។

នាយក​ប្រតិបត្តិ CIM៖ «ខ្ញុំ​រំភើប​ខ្លាំង​មែនទែន​សម្រាប់​​បងប្អូន​ទាំងអស់​ដែល​ចូលរួម​ក្នុង​​កម្មវិធី ហើយ​ក៏​ជា​ឱកាស​ល្អ​ដែល CIM បាន​បង្កើត​កម្មវិធី ដើម្បី​ថ្លែង​អំណរ​គុណ​ដល់​បណ្ដាល​បងប្អូន​ជា Designer ជា Make-up artist និង​បងប្អូន​សារព័ត៌មាន​ទាំងអស់​ដែល​តែងតែ​ជួយ​គាំទ្រ​កន្លង​មក។ អាច​និយាយ​បាន​ថា ក្នុង​អំឡុង​ពេល​កូវីដ​រយៈ​ពេល​១ ឆ្នាំ​ជាង​នេះ ក្រុមហ៊ុន​ផ្សេង​ៗ​មាន​បញ្ហា​ច្រើន ហើយ​ខ្លះ​ក៏​បាន​បិទ តែ​សម្រាប់ CIM នៅ​តែ​រវល់ ដោយសារ​ក្នុង​ពេល Lockdown ខ្ញុំ​បាន​ព្យាយាម​បម្លែង​កម្មវិធី​ប្រកួត​ផ្សេង​ៗ​ទៅ​កម្មវិធី​ប្រកួត​អនឡាញ។ ឆ្នាំនេះ​យើង​មាន​កម្មវិធី​កាន់តែ​ច្រើន​ដូចជា ការ​ប្រកួត​បញ្ចប់ Miss Queen Cambodia យើង​ទើប​ប្រកាស​ទទួល​ពាក្យ​ប្រកួត Miss Universe Cambodia 2022 ថ្មី​នេះ បន្ត​មក​ក៏​នឹង​មាន​ការ​ប្រកួត Miss Cambodia 2022, Face of Cambodia 2022 និង​កម្មវិធី​បន្តបន្ទាប់​ទៀត។ អាច​និយាយ​ថា កម្មវិធី​ប្រកួត​ក្នុង​ស្រុក​យើង​មាន ៦ កម្មវិធី និង​កម្មវិធី​ប្រកួត​បន្ត​លើក​ឆាក​អន្តរជាតិ​ជិត ៤០ កម្មវិធី»។

ម៉ែន និមលរតន៍ បាន​បន្ត​ទៀត​ថា «ខ្ញុំ​នៅតែ​មាន​គំនិត​សុទិដ្ឋិនិយម​ក្នុង​ការ​បណ្ដុះបណ្ដាល​ក្មេង​ជំនាន់​ក្រោយ ឱកាស​មាន​ច្រើន​ណាស់សំខាន់​ប្អូន​ៗ​នៅ​ពេល​ចូលរួម​ការងារ​សិល្បៈឬ​ចង់​ជោគជ័យ​ក្នុង​អាជីព​អី​មួយសុំ​ឱ្យ​មាន​ការ​តាំង​ចិត្ត​ខ្លួនឯង​ក្នុង​ការ​ធ្វើ​ឱ្យ​​ខ្លួនឯង​រីក​ចម្រើនក្រុមហ៊ុន​ជា​ចំណែក​មួយ គឺ ៥០%ក្នុង​ការ​ជំរុញនិង​ជួយ​បណ្ដុះបណ្ដាល​ប្អូន​ទៅ​រក​ភាព​ជោគជ័យប៉ុន្តែ​បើ​ខ្លួនឯង​មាន​ការ​តាំងចិត្ត​ខ្លាំងខ្ញុំ​ជឿ​ថា ទាំងអស់​គ្នា​នឹង​ទទួល​ភាព​ជោគជ័យ។វា​ជា​បទ​ពិសោធន៍​របស់​ខ្ញុំ»។

CIM វិវត្តន៍​ខ្លួន​ក្នុង​ពេល​ដ៏​ខ្លី និង​ទទួល​បាន​ជោគជ័យ​ជា​ផ្លែផ្កា។ ក្រុមហ៊ុន​នេះ មាន​ហ្វឹកហាត់ និង​គ្រប់គ្រង​តារា និង​តួ​វ័យក្មេង ដើម្បី​ក្លាយ​ជា​តារា​បង្ហាញ​ម៉ូត តារា​សម្ដែង ពិធី​ករ និង​តារា​ល្បី។ មិន​តែ​ប៉ុណ្ណោះ CIM ក៏​ជា​​ភ្នាក់ងារ​ទទួល​រៀបចំ​កម្មវិធី​ប្រកួតប្រជែង​ថ្នាក់​ជាតិ​ ដូចជា​បវរកញ្ញា​ចក្រវាល​កម្ពុជា និង​បវរកញ្ញា​អន្តរជាតិ​ជាដើម និង​មាន​ទទួល​ផលិត​កម្មវិធី​ទូរទស្សន៍ Digital Content និង​ព្រឹត្តិការណ៍​ផ្សព្វផ្សាយ​ផ្សេង​ៗ​យ៉ាង​សម្បូរ​បែប៕