Kristen Stewart ដែលទើបតែចេញដឹកនាំភាពយន្តកុនជាលើកដំបូង បានបង្ហាញចំណាប់អារម្មណ៍ចង់ផ្លាស់ប្ដូរតួនាទីពីតួឯកស្រី មកជាអ្នកដឹកនាំរឿង Twilight វិញ បើភាពយន្តនេះផលិតឡើងវិញម្ដងទៀត។


នៅដើមឆ្នាំ២០២៦ នេះ Kristen Stewart ទើបតែទទួលបានកោតសរសើរយ៉ាងទូលំទូលាយ ក្រោយតារាស្រីដែលធ្លាប់តែដឹកនាំភាពយន្តខ្នាតខ្លី បានចាប់ឱកាសដឹកនាំភាពយន្តកុនដំបូងរបស់ខ្លួន ក្រោមចំណងជើងថា The Chronology of Water។
នៅគ្រាចូលរួមក្នុងមហោស្រពភាពយន្ត Palm Springs ក្នុងនាមជាអ្នកដឹកនាំភាពយន្ត កម្មវិធីព័ត៌មានកម្សាន្ត Entertainment Tonight បានសាកសួរតារាស្រីវ័យ ៣៥ឆ្នាំថា បើមានឱកាសដឹកនាំភាពយន្តរឿងដែលនាងបានសម្ដែងកន្លងមក ដូចជារឿង Twilight តើនាងនឹងគិតយ៉ាងណា?
Kristen Stewart បានតបវិញថា នាងរីករាយនឹងសាកល្បងដឹកនាំភាពយន្តរឿងបិសាចជញ្ជក់ឈាមនេះ បើនាងមានឱកាស ខណៈនាងបានសរសើរដល់អ្នកដឹកនាំរឿង Twilight គ្រប់ភាគថា ពួកគេធ្វើចេញមកមានរសជាតិជារបស់ខ្លួនឯង ចម្លែក និងមិនធម្មតា រហូតអាចធ្វើឱ្យភាពយន្តនេះផ្ទុះការគាំទ្រខ្លាំង។

ក្នុងករណីដែលទទួលបានឱកាសដឹកនាំរឿងនេះ នាងបាននិយាយថា៖ “ស្រមៃទៅមើលថា បើយើងមានលុយដើម្បីធ្វើកុនច្រើន ហើយមានអ្នកដែលស្រឡាញ់ និងចាំគាំទ្រយ៉ាងពេញទំហឹង ខ្ញុំក៏ចង់យករឿងនេះមកថតឡើងវិញដែរ។ ខ្ញុំប្រាកដជាធ្វើវា”។
គួរឱ្យដឹងផងដែរថា Twilight គឺជាភាពយន្តផលិតឡើងផ្អែកតាមឈុតប្រលោមលោករបស់អ្នកនិពន្ធ Meyer Novel នាំសម្ដែងដោយ Kristen Stewart រួមជាមួយតារាប្រុស Robert Pattinson និង Taylor Lautner។ ភាពយន្តដែលមានសរុប ៥ភាគនេះ បានរកចំណូលសរុបរហូតដល់ទៅ ៣.៣ពាន់លានដុល្លារអាមេរិក។

នៅខែតុលា ឆ្នាំ២០២៥ កន្លងទៅ ភាពយន្ត Twilight គ្រប់ភាគបានត្រឡប់មកចាក់បញ្ចាំងក្នុងរោងភាពយន្តម្ដងទៀត ក្នុងគម្រប់ខួប ២០ឆ្នាំនៃការចេញផ្សាយប្រលោមលោកភាគដំបូង ខណៈនៅតែមានប្រជាប្រិយភាពដូចដើម ដោយអាចរកចំណូលបានដល់ទៅ ១.៥៥លានដុល្លារអាមេរិកត្រឹម ១ថ្ងៃដំបូង។
លើសពីនេះទៀត បច្ចុប្បន្ន Netflix កំពុងតែផលិតគំនូរជីវចលរឿង Midnight Sun ដែលជាសាច់រឿងរបស់ Edward Cullen ជាតួអង្គរបស់ Robert Pattinson នៅក្នុងភាពយន្តទម្រង់មនុស្សសម្ដែង៕



























Account
Security
Favourite Content