ជាលើកដំបូងបង្អស់ដែលផលិតករឯករាជ្យ លោក សេង ធី សម្រិតសម្រាំងផលិតជាភាពយន្តខ្នាតធំ ចំណងជើង «បងលុច្សឃើញខ្មោច» ក្រោមការវិនិយោគរបស់ Westec Media។ «បងលុច្សឃើញខ្មោច» បានរៀបចំពិធីសម្ភោធចាក់បញ្ចាំងជាផ្លូវការយ៉ាងអធិកអធម នៅរោងភាពយន្ត លេជេន អេដេន កាលពីថ្ងៃទី ២០ ខែកុម្ភៈ ឆ្នាំ២០២៤ កន្លងទៅ ដោយមានការចូលរួមពីសំណាក់តួអង្គសម្តែងល្បីៗ រួមទាំងតារា-ភ្ញៀវកិត្តិយសយ៉ាងច្រើនកុះករ។







លោក សេង ធី ផលិតករ និងជាអ្នកដឹកនាំរឿងបានឱ្យដឹងថា រឿង «បងលុច្សឃើញខ្មោច» ដកស្រង់ពីរឿងហេតុពិត ដែលបានកើតឡើងក្នុងការរស់នៅប្រចាំថ្ងៃ និងការនិទានរឿងខ្មោចផ្សេងៗលើបណ្តាញសង្គម ដែលលោកបានចុះទៅប្រមូលទិដ្ឋន័យ និងច្បិចយកមកធ្វើជាឆ្អឹងនៃសាច់រឿង។ «បងលុច្សឃើញខ្មោច» ជាប្រភេទរឿងរន្ធត់ (horror movie) លាយឡំស្នេហាបែបកំប្លុកកំប្លែង ដែលនឹងធ្វើឱ្យអ្នកទស្សនាភ័យរន្ធត់ព្រឺព្រួច តែក៏អស់សំណើចជាមួយឈុតឆាកកំប្លែកស្ងួតរបស់តួអង្គផងដែរ។

លោកបានធ្វើការ casting តួអង្គមុខថ្មីៗជាច្រើនមកសម្តែងរឿងនេះ ដើម្បីផ្តល់ឱកាសឱ្យអ្នកមានសមត្ថភាពពិតប្រាកដ រីឯវត្តមានកំលោះសង្ហា ខេស៊ីញ និងស្រីស្អាត ជីហ្ស័ង រឹតតែធ្វើសាច់រឿងនេះមានភាពរស់រវើក ព្រោះកន្លងមកអ្នកទាំងពីរធ្លាប់ធ្វើការជាមួយគ្នាច្រើនហើយ យល់ចិត្តគ្នាស្រាប់។

មែនទែនទៅ ការផលិតរឿង horror movie ជាអ្វីដែលថ្មីសម្រាប់ផលិតកររូបនេះ ព្រោះកន្លងមកលោកនិយមផលិតតែរឿងមនោសញ្ចេតនា ឬភាពយន្តខ្នាតខ្លីសម្រាប់ការប្រកួតជាតិ-អន្តរជាតិផ្សេងៗប៉ុណ្ណោះ ប៉ុន្តែការសម្រេចផលិតរឿង «បងលុច្សឃើញខ្មោច» ជាប្រភេទ horror movie គឺតម្រូវតាម trending ទីផ្សារនាពេលបច្ចុប្បន្ន ដែលការស្រាវជ្រាវបង្ហាញឱ្យឃើញថា យុវវ័យភាគច្រើនមានទំនោរលើរឿងរន្ធត់ព្រឺព្រួច ទើបលោកចងក្រងសាច់រឿងនេះឡើងមក។
ផលិតករវ័យ៣២ឆ្នាំរូបនេះ សង្ឃឹមថា ពុកម៉ែបងប្អូននឹងពេញចិត្តស្នាដៃភាពយន្តដំបូងរបស់ Tiny Film Production ហើយលោកសង្ឃឹមថា ភាពយន្តនឹងអាចបន្តចាក់នៅក្រៅប្រទេស នាពេលខាងមុខផងដែរ។



សូមជម្រាបថា រឿង «បងលុច្សឃើញខ្មោច» បានជាប់ជាភាពយន្តខ្មែរដែលរកចំណូលបានច្រើនជាងគេក្នុងថ្ងៃចាក់ដំបូងរបស់ខ្លួន កាលពីថ្ងៃទី ២២ កុម្ភៈ កន្លងទៅ និងបានជាប់ជាភាពយន្តរកចំណូលបានច្រើនជាងគេកាលពីសប្តាហ៍មុន នៅរោងភាពយន្ត RSB ឯកភ្នំ Cinema RSB Ek Phnom ថែមទៀតផង។ រឿង «បងលុច្សឃើញខ្មោច» កំពុងចាក់បញ្ចាំងគ្រប់រោងភាពយន្តទូទាំងប្រទេសកម្ពុជា ចាប់ពីថ្ងៃទី ២២ ខែកុម្ភៈ តទៅ៕


























Account
Security
Favourite Content