នៅចាំនាវាយក្សដែលកម្ពុជាឲ្យចតកាលកូវីត-១៩ ឥឡូវ MS Westerdam

កាលពីឆ្នាំ ២០២០ នាវា MS Westerdam ដែលផ្ទុកមនុស្ស ២ ២៥៧ នាក់ នៅលើនោះ បានចំណាយពេលជិត ២ សប្ដាហ៍នៅសមុទ្រមិនអាចចរចាបានជោគជ័យលើកំពង់ផែដែលត្រូវចូលចតឡើយ ដោយប្រទេសជាច្រើនបានបដិសេធ តែកម្ពុជាតែមួយគត់ ដែលទទួលកប៉ាល់យក្សមួយនេះឲ្យចុះចត។

រូបភាពនៅថ្ងៃទី ១៣ ខែកុម្ភៈ ឆ្នាំ ២០២០ ដោយ ប៉ែន រដ្ឋា

រូបភាពកាលពីថ្ងៃ ២៨ ខែធ្នូ ឆ្នាំ ២០២៣

នៅព្រឹកថ្ងៃ ១៨ ខែវិច្ឆិកា ឆ្នាំ ២០២៥ នេះ នាវាទេសចរណ៍ MS Westerdam បានត្រឡប់មកចូលចតនៅកំពង់ផែក្រុងព្រះសីហនុ ប្រទេសកម្ពុជាជាលើកទី៣ ហើយនាំអ្នកដំណើរអន្តរជាតិជិត ២ ពាន់មកជាមួយ។ កាលពីឆ្នាំ ២០២៣ MS Westerdam បានត្រលប់មកប្រទេសកម្ពុជាជាលើកទីពីរហើយ។

ថ្នាក់ដឹកនាំរបស់នាវាទេសចរណ៍មួយនេះ មិនភ្លេចឡើយទឹកចិត្តដ៏ធំធេងរបស់កម្ពុជា អំឡុងពេលកូវីដ-១៩ ដែលកាលនោះមានតែប្រទេសមួយគត់ដែលយល់ព្រមឲ្យពួកគេចូលចត។ ព្រឹត្តិការណ៍មនុស្សធម៌ ដែលសម្ដេចតេជោ ហ៊ុន សែន ដែលជានាយករដ្ឋមន្ត្រីនាគ្រានោះ បានធ្វើនាពេលនោះ ធ្វើឲ្យកម្ពុជាល្បី រន្ទឺ ពេញពិភពលោក ជាមួយនឹងពាក្យថា «កម្ពុជាតូច តែបេះដូងធំ»។ ចាប់តាំងពីនោះមក នាវាមួយនេះមិនដែលភ្លេចកម្ពុជា និងតែងតែនឹករលឹកចូលចតនៅកំពង់ផែព្រះសីហនុជានិច្ច។

MS Westerdam បានត្រឡប់មកលើកទី២ និងនាំយកភ្ញៀវទេសចរណ៍អន្តរជាតិ ១ ៨៥០ នាក់មកលេងកម្ពុជា។ ក្នុងចំណោមភ្ញៀវ ១ ៨៥០ នាក់ មានស្រី ៩៩២ នាក់ និង ៤៣ សញ្ជាតិ ហើយក្នុងនោះមាននាវិក ៨០៤ នាក់ ស្រី ១៥៦ នាក់។

ភ្ញៀវដែលមានច្រើនជាងគេ គឺមកពីសហរដ្ឋអាមេរិក អូស្ត្រាលី និងប្រទេសកាណាដា។ បើយោងតាមការបង្ហោះពី កំពង់ផែស្វយ័ត ក្រុងព្រះសីហនុ បានឲ្យដឹងថា នាវាទេសចរណ៍នេះ នឹងចាកចេញពីកំពង់ផែក្រុងព្រះសីហនុ បន្តទៅប្រទេសផ្សេងទៀត នៅម៉ោង៨យប់ថ្ងៃទី១៨ ខែវិច្ឆិកា ឆ្នាំ២០២៥។

កប៉ាល់នេះទទួលបានការអនុញ្ញាតពីរាជរដ្ឋាភិបាលកម្ពុជា ឲ្យចូលចតនៅកំពង់ផែក្រុងព្រះសីហនុ កាលពីថ្ងៃទី១៣ ខែកុម្ភៈ ឆ្នាំ ២០២០។ ការសម្រេចចិត្តនេះបានធ្វើឲ្យកម្ពុជាទទួលបានការចាប់អារម្មណ៍ពីអន្តរជាតិ ហើយក៏បានឆ្លើយតបទៅនឹងស្ថានភាពដ៏លំបាកនាគ្រាជំងឺកូវីដ-១៩ រីករាលដាល។

អ្នកដំណើរដំបូងបានចុះពី MS Westerdam នៅថ្ងៃបុណ្យនៃក្ដីស្រលាញ់ ហើយត្រូវបានទទួលស្វាគមន៍ដោយផ្ទាល់ពីសម្ដេច ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា៕