តារាចម្រៀងសម្បុរស្រអែមស្រស់ កញ្ញា អ៊ិត ជូលីណា ត្រូវគេស្គាល់ថាជាប្អូនជីទួតមួយរបស់តារាចម្រៀង ខេមរៈ សិរីមន្ត និង ខេមរៈ ស្រីពៅ បានបោះជំហានចូលវិស័យសិល្បៈតាមរយៈការត្រួសត្រាយ និងជួយជ្រោមជ្រែងពីលោក ខេមរៈ សិរីមន្ត តារាចម្រៀងនៅផលិតកម្មហង្សមាស និងលោក ខេមរៈ ភារុណ អ្នកនិពន្ធបទចម្រៀងល្បីឈ្មោះ។
អ៊ិត ជូលីណា បានបង្កភាពភ្ញាក់ផ្អើលជាខ្លាំងដល់មហាជនឱ្យចាប់អារម្មណ៍លើរូបនេះ ដោយសារទឹកដមសំនៀងដ៏ពីរោះរណ្តំរបស់នាង ថែមទាំងស្រដៀងគ្នាខ្លាំងនិងកញ្ញា ខេមរៈ ស្រីពៅ ទៀតផង។
គិតត្រឹមដើមឆ្នាំ២០២២នេះ កញ្ញា អ៊ិត ជូលីណា បានបញ្ចេញបទចម្រៀងរបស់ខ្លួនបានជាច្រើនបទ ក្នុងនោះគេចាប់អារម្មណ៍ឃើញមានបទល្បីៗដូចជា «ទុកពេលឱ្យបងកែខ្លួន» «គេកូនអ្នកមានសាច់ឈាមមិនដូចបងទេ» «សមមុខហើយដែលអូនក្បត់បង» និងមានបទចម្រៀងជាច្រើនទៀត ដែលសុទ្ធសឹងជាបទមិនចម្លងពីបរទេស (Original Song)។
ក្រៅពីមានសមត្ថភាពច្រៀងហើយនោះ គេកត់សម្គាល់ឃើញថា កញ្ញា អ៊ិត ជូលីណា ក៏មានទេពកោសល្យអាចនិពន្ធបទចម្រៀង និង Melody បានថែមទៀតផង។ បច្ចុប្បន្ន គេឃើញតារាស្រីវ័យក្មេងនេះ ទទួលបានការងារថតសម្អាងការផងដែរ ហើយថែមទាំងមានរបរផ្ទាល់ខ្លួន១ទៀត។
អ៊ិត ជូលីណា បានលើកឡើងឱ្យដឹងថា កញ្ញាពិតជាបានយកស្ទីល៍ខ្លះៗពីបងស្រីជីទួតមួយ កញ្ញា ខេមរៈ ស្រីពៅ ដែលជាម្ចាស់បទដើមពិតមែន ក៏ប៉ុន្តែភាគច្រើន គឺកញ្ញាប្រើស្ទីលច្រៀងជារបស់ខ្លួនឯងច្រើនជាង នៅពេលបកស្រាយបទចម្រៀងនីមួយៗ។
កន្លងមក អ៊ិត ជូលីណា ធ្លាប់ប្រាប់ឱ្យដឹងថា កញ្ញាមានមហិច្ឆតាក្នុងចិត្ត ចង់ក្លាយជាតារាចម្រៀងល្បីឈ្មោះដូចជា លោក ខេមរៈ សិរីមន្ត និងកញ្ញា ខេមរៈ ស្រីពៅ ដែរ។
គួររំឮកផងដែរថា កញ្ញា អ៊ិត ជូលីណា ទើបប្រឡូកសិល្បៈតន្ត្រី ក្នុងនាមតារាចម្រៀងប្រមាណ២ឆ្នាំប៉ុណ្ណោះ។ តារាចម្រៀងវ័យក្មេងត្រូវបានគេស្គាល់តាមរយៈការច្រៀង Cover ឡើងវិញបទចាស់ៗរបស់តារាចម្រៀងស្រី ខេមរៈ ស្រីពៅ ដែលបានលាចាកលោកទៅហើយនោះ ដែលបទទាំងនោះត្រូវបានបង្ហោះជាសាធារណៈលើ Channel YouTube របស់តារាចម្រៀងជួរមុខប្រទេសកម្ពុជា ខេមរៈ សិរីមន្ត តែម្តង ៕