គេនៅចាំបានថា តារាចម្រៀងថោនលោកករុណា ពេជ្រ បានអូសវ៉ាលីចេញដំណើរឡើងយន្ដហោះនៅអាកាសយានដ្ឋានអន្ដរជាតិភ្នំពេញ នៅថ្ងៃទី២០ខែធ្នូឆ្នាំ២០២១ ដើម្បីទៅបារាំងជួបនិងមើលថែម្ដាយដែលទើបតែបានធូរស្រាលពីជំងឺត្បៀតសសៃឈាម បន្ទាប់ពីឪពុករបស់លោកទទួលមរណភាពកាលពីថ្ងៃទី១៤ខែតុលាឆ្នាំ២០២១ កន្លងទៅ។
បន្ទាប់ពីបានទៅដល់ និងបានចំណាយពេលវេលាមើលថែទាំអ្នកម្តាយនៅប្រទេសបារាំងបានប៉ុន្មានថ្ងៃ ស្រាប់តែ ករុណា ពេជ្រ បង្ហោះសារមួយភ្ជាប់ជាមួយរូបថតជាច្រើនសន្លឹកបង្ហាញពីសកម្មភាពកំពុងមើលថែទាំអ្នកម្តាយ។ តាមរយៈអ្វីដែលលោកបង្ហោះ លោកបានផ្តាំឱ្យបងប្អូនធ្វើរឿងមួយ ដើម្បីកុំឱ្យសោកស្តាយនៅថ្ងៃក្រោយ។
តារាចម្រៀងថោនករុណា ពេជ្រ បង្ហោះថា៖«ពីរ នាក់ម៉ែកូន…ជីវិត គឺ តែប៉ុណ្ណឹង …កាលក្មេងម៉ែដឹកដៃកូន ដល់ចាស់កូនរុញរទេះម៉ែ វាគឺជារឿងសាមញ្ញ ហើយវាក៏ជាច្បាប់ធម្មជាតិ….សូមផ្តាំ: ចំពោះបងប្អូន ដែលកំពុងមានឪពុក ម្តាយ នៅមានជីវិត សូមកុំអោយស្តាយក្រោយ រឺ ហួសពេល គួរធ្វើអ្វីដែលជាស្នាមញញឹមអោយបានច្រើន ហើយអោយទាន់ពេល ក្នុងនាមយើងដែលមានការតព្វកិច្ចជាកូន ចំពោះឪពុកម្តាយ …ព្រោះពេលវេលាពិតជាលឿនណាស់ ហើយអ្វីដែលខ្ញុំកំពុងនិយាយ គឺ ជាអ្វីដែលខ្ញុំបានឆ្លងកាត់ អស់ទៅហើយ….»
គួររំលឹកផងដែរថា លោកករុណា ពេជ្រ ត្រូវគ្រប់គ្នាចាត់ទុកជាតារាកត្តញ្ញូម្នាក់ដែលបានចំណាយពេលវេលា និងប្រាក់កាក់មើលថែទាំឪពុកដែលមានជំងឺប្រចាំកាយអស់រយៈពេលជាច្រើនឆ្នាំ ហើយពេលនេះទៀតសោតលោកក៏បានចំណាយពេលហោះទៅប្រទេសបារាំងដើម្បីមើលថែទាំអ្នកម្តាយដែលទើបតែបានធូស្រាលពីជំងឺទៀតផង។
តាមការឱ្យដឹងពី ករុណា ពេជ្រ អ្នកម្ដាយរបស់លោកបានទៅរស់នៅប្រទេសបារាំងរយៈពេលជាង២០ឆ្នាំមកហើយ ខណៈរៀងរាល់ឆ្នាំឲ្យតែនៅខែត្រជាក់គាត់ច្រើនតែចុះមកស្រុកខ្មែរ តែដោយសារតែមុននេះម្ដាយទើបមានសុខភាពល្អឡើងវិញបាន៦០%ពីជំងឺទើបលោកត្រូវតែចេញទៅជួបនិងមើលម្ដាយដោយផ្ទាល់នៅទីនោះ។
ដោយឡែក ការចាកចេញទៅបារាំងលើកនេះ លោកទទួលបានVisa ដល់ទៅ១ឆ្នាំ ស្របពេលកន្លងមកលោកធ្លាប់តែបានVisa ពី១ទៅ៣ខែឬ៤៥ថ្ងៃប៉ុណ្ណោះ។ យ៉ាងណា សម្រាប់ដំណាក់កាលដំបូងលោកទៅត្រឹមតែជិត៣អាទិត្យសិនប៉ុណ្ណោះ ព្រោះត្រូវចុះមករៀបចំធ្វើបុណ្យខួបគម្រប់១០០ថ្ងៃឲ្យឪពុកឧបាសកម៉ុក សាខន នៅថ្ងៃទី១៨ខែមករាឆ្នាំ២០២២ ខាងមុខនេះ នៅស្រុកកំណើតឪពុកនិងជាទីបញ្ចុះសពរបស់គាត់នៅភូមិខ្សាច់ស ឃុំរក្សជ័យ ស្រុកបាភ្នំ ខេត្តព្រៃវែង ៕