តារាសម្ដែងជួរមុខរបស់កូរ៉េខាងត្បូង Song Hye Kyo និង Gong Yoo បានចាប់ដៃគ្នាសម្ដែងក្នុងគម្រោងភាពយន្តភាគថ្មី Slowly but Intensely ជាភាពយន្តទុនធំ គ្រោងចាក់ផ្សាយនៅលើ Netflix។
កាលពីពេលថ្មីៗនេះ តារាសម្ដែងស្រី Song Hye Kyo បានទាក់ទាញចំណាប់អារម្មណ៍អ្នកគាំទ្រជាខ្លាំង ក្រោយនាងលេចមុខនៅលើគណនីយូធូប Fairy Jaehyung ជាមួយនឹងម៉ូដសក់ថ្មីខ្លីត្រឹមក ព្រមបង្ហើបឱ្យដឹងថា ការកាត់សក់នេះគឺធ្វើឡើងដើម្បីគម្រោងភាពយន្តថ្មី និយាយពីជីវិតក្នុងទសវត្សរ៍ឆ្នាំ១៩៦០ ទៅ១៩៧០។
ជាក់ស្ដែង កាលពីថ្ងៃទី១៣ មករានេះ Star News បានឱ្យដឹងថា គម្រោងភាពយន្តថ្មីនេះ មានចំណងជើងបណ្ដោះអាសន្នថា Slowly but Intensely ដោយនាងបានសហការណ៍រួមគ្នាជាមួយនឹងតួឯកប្រុស Gong Yoo និងជាស្នាដៃនិពន្ធរបស់កវីល្បីឈ្មោះ Noh Hee Kyung ដែលធ្លាប់និពន្ធរឿងភាគល្បីៗដូចជា “It’s Okay, That’s Love” “Dear My Friends” និង “Our Blues” ជាដើម។
ដោយមានសរុបចំនួន ២២ភាគ ដំណើររឿងទាំងមូលរបស់ Slowly but Intensely គឺនិយាយពីជីវិតរបស់សិល្បករកូរ៉េខាងត្បូង និងអ្នកធ្វើការក្នុងវិស័យសិល្បៈកាលពីជំនាន់ទសវត្សរ៍ឆ្នាំ១៩៦០ និង១៩៧០។ គម្រោងខាងលើនេះ ផលិតកម្មបានបោះទន់រហូតដល់ទៅ ៧០ ពាន់លានវ៉ុន ឬប្រមាណ ៥០លានដុល្លារអាមេរិកឯណោះ ដោយគ្រោងនឹងបញ្ចប់ការថតនៅពាក់កណ្ដាលឆ្នាំ២០២៥នេះ។
គួរបញ្ជាក់ផងដែរថា នេះជាការធ្វើការួមគ្នាលើកទី៣ រវាងតារាស្រីវ័យ៤៣ឆ្នាំ និងអ្នកនិពន្ធ Noh Hee Kyung ដោយកន្លងមកនាងធ្លាប់ទទួលបានឱកាសសម្ដែងនៅក្នុងរឿង Worlds Within និង That Winter, the Wind Blows។ ទន្ទឹមគ្នានេះដែរ ភាពយន្តនេះជាភាពយន្តភាគទី២ ដែលតារាប្រុសវ័យ៤៥ឆ្នាំបានរួមសម្ដែងក្នុងស្នាដៃរបស់អ្នកនិពន្ធខាងលើ បន្ទាប់ពីរឿង Coffee Prince៕