កាលពីពេលថ្មីៗនេះ Ejae, Audrey Nuna និង Rei Ami ម្ចាស់សំនៀងពីក្រោយក្រុមចម្រៀង HUNTR/X បានចូលរួមក្នុងកម្មវិធី The Tonight Show Starring Jimmy Fallon ដោយនៅទីនោះ EJae បានបង្ហើបថា នាងបានឃើញខ្មោចនៅពេលកំពុងថតបទ Golden ដែលប្រជាជនកូរ៉េមានជំនឿថា នេះគឺជាប្រផ្នូលល្អ។

ការចូលរួមនៅក្នុងវគ្គថ្មីដែលបានចាក់ផ្សាយកាលពីថ្ងៃទី៨ ខែតុលានេះ គឺជាលើកដំបូងរបស់នារីទាំង ៣ដែលបានបកស្រាយបទ GOLDEN ដោយផ្ទាល់ ខណៈ Ejae ក៏បានរៀបរាប់ពីប្រវត្តិនៃការសរសេរ និងជំនឿដែលនាងបានជួបនៅពេលដែលធ្វើការលើចម្រៀងមួយបទនេះផងដែរ។
តារាចម្រៀងកូរ៉េអាមេរិកាំងរូបនេះបានរៀបរាប់ថា នាងទទួលបានបទនេះនៅពេលដែលកំពុងតែជិះតាក់ស៊ីទៅពេទ្យធ្មេញ ហើយដោយសារតែទំនុកភ្លេងពីរោះពេក ទើបធ្វើឱ្យនាងត្រូវបើកកម្មវិធីថតសំឡេងដើម្បីថតមេឡូឌីដែលនាងរកនឹកឃើញនៅលើឡានតែម្ដង។

បន្តពីនេះ តារាស្រីវ័យ ៣៣ឆ្នាំបានរៀបរាប់ថា៖ “ខ្ញុំបានជួបខ្មោចនៅពេលដែលថតបទ Golden។ ពេលកំពុងថត កន្លែងគ្រប់គ្រងកម្រិតសំឡេងមិនដំណើរទេ ទើបខ្ញុំហៅក្រុមការងារឱ្យមកជួយ។ ពេលនោះខ្ញុំបានឮសំឡេងបើកទ្វារ ហើយឮសំឡេងសម្រិបជើងមនុស្សដើរចូលមក។ គាប់ចួនអីម៉ាស៊ីនក៏ដំណើរការឡើងវិញ ហើយពេលខ្ញុំបែរទៅមើលអ្នកដែលដើរចូលមក ខ្ញុំអត់ឃើញមាននរណានៅទីនោះទេ។ និយាយទៅ ខ្ញុំបានឃើញបុរសម្នាក់ដែលខ្ពស់ តែមួយភ្លែតប៉ុណ្ណោះ”។
“ក្រោយមក ម៉ាក់ខ្ញុំបានប្រាប់ថា នៅកូរ៉េមានជំនឿមួយ ដែលគេជឿថា បើសិនជាឃើញខ្មោច ឬមានហេតុការណ៍អ្វីដែលមិនអាចពន្យល់បានកើតឡើងនៅពេលថតបទចម្រៀង មានន័យថា បទនោះនឹងល្បី” Ejae បន្តដូច្នេះ។


យោងតាមអត្ថបទពី Creatrip ប្រជាជនកូរ៉េមានអបិយជំនឿថា បើបុគ្គលណាបានជួបខ្មោច មានន័យថា បុគ្គលនោះនឹងទទួលបានជោគជ័យធំមួយក្នុងពេលឆាប់ៗ ដោយជំនឿនេះក៏បន្តកើតមាននៅក្នុងវិស័យខេប៉ុបផងដែរ។
តួយ៉ាង ចម្រៀងពីភាពយន្តគំនូរជីវចលរឿង KPop Demon Hunters ចំណងជើងនេះ គឺជាបទចម្រៀងកំពូលប្រជាប្រិយភាពមួយ ដែលបានជាប់ឈ្មោះក្នុងចំណាត់ថ្នាក់កំពូលនៅលើតារាងធំៗជុំវិញពិភពលោក រួមមានតារាង Billboard Global 200 និង British Official Singles Chart Top 100 ជាដើម៕

























Account
Security
Favourite Content